忙到不知幾點~      教你滋潤快枯萎の心靈

你知唔知個「忙」字點解呀?

就係公私兩忙日忙夜忙,搞到個心都亡埋呀。正所謂,做女人難,做職業女性更難,仲要係人老婆媽媽就更係難難難,keep住滋潤個靚樣唔好咁快變黃面婆之餘,仲要照顧埋忙到枯萎嘅心靈。之但係,塊面乾燥就話敷返個mask啫,心靈乾涸又可以點樣滋潤返佢?文青會做嘅打坐冥想運動睇書,大家都知唔駛多講啦,今次就等我哋傾吓冇咁扮嘢、落地啲嘅「滋潤心靈完勝技」!

 

心繫八卦是常識吧

如果話書本係精神嘅食糧,咁女人心靈嘅補品就一定係… 登登… 就係八卦卦卦卦卦… !有咩爽得過一班姊妹圍埋一齊八卦吹水,上至娛圈政界緋聞大揭秘,下至老闆同事鄰居精彩搞笑事,無所不談乜都可以吹餐飽。就算之前忙到個人呆呆滯滯都好,至少喺傾八卦嘢嘅呢幾粒鐘,你係精神爽利嘅!

 

打開心窗見OPPA

雖則話愛情係女人最好嘅補品,但有時同男友見得多都會悶。加上隔籬飯香,有邊個男友比得上韓劇入面嘅OPPA?就算有OPPA咁高,都未必有OPPA咁俊,有佢咁俊,都唔會好似OPPA咁識時間停頓瞬間移動!所以,當心靈空虛而男友又只顧打機唔理你之時,煲劇吧!雖然OPPA永遠得不到,但煲劇幻想吓,都無傷大雅。

 

用物質填補心靈

心靈嘅空虛,有時真係可以用物質填補嘅!尤其是個人好悶好躁好煩嘅時候,Shopping真係可以解千愁。如果唔想駛太多錢,可以唔行名店,轉行supermarket。雖然行超市就算未至於買嘢唔駛睇價錢,但至少大部份嘢都afford到,大手大手掃、一包二包走,諗起都令人興奮。當然,想更加開心,就係帶埋男友去畀錢,滋潤心靈嘅效果更佳。

 

快樂甜入心

好多女人就算食到幾飽,到甜品時自然會生出第二個胃。聽聞話食甜品會令腦部產生幸福嘅感覺,由於我對生物學零研究,所以真定假我唔知,但食完甜品後嗰種滿足感覺,確係可以令人忘記心靈上嘅枯燥。所以,姊妹們吃吧,最多食完再去做運動減肥!

 

女人唔易做,只要唔影響人哋,能夠令自己開心嘅任何方法,其實都可以係你嘅「滋潤心靈完勝技」!其他人點睇,老老實實,真係唔駛點理!