成日都比人洗楓葉版 今次輪到你洗人版

你有冇發現,每年秋天,你嘅Facebook就會被染成一片又一片嘅紅…  一張又一張friend子去賞楓嘅靚靚相,完完全全將你嘅Facebook洗版!你仲記唔記得,當時你嗰種羨慕妒忌恨,然後暗暗下決定,今年一定要同老闆請假去賞楓,洗返班friend版!

唔理你係之前畀楓葉洗版,定係洗人版嗰個,就快到賞楓嘅季節,我都想同大家一齊分享吓「賞楓完勝技」:

 

留住這楓 Oh Baby

當眼前就係一片紅海般嘅楓葉,此情此景,梗係攞部相機出嚟留住咁靚嘅景色。點先影到靚靚楓葉相?記住,光係你最好嘅朋友。光線唔同,照出嚟嘅紅楓都會展現出唔同嘅顏色層次。利用逆光,將光圈調校至f11-14,可以突出响楓葉之間透出嚟嘅陽光。到咗夜晚,楓葉喺燈光映照下,又另有一番風味,記得影夜楓時要帶定腳架呀!再唔係,响高處影滿山遍地嘅紅,連綿不絕嘅楓葉盡收眼底…  總之,帶定唔同嘅鏡頭,好似長焦鏡去影高處紅葉、廣角鏡去影人以增強空間感、微距鏡去影楓葉特寫、環型偏光鏡去還原楓葉嘅顏色。有充足準備,自然可以將不同嘅靚靚楓葉景一一留住!

 

做個有禮賞楓人

雖然啱啱先講完要用相機留楓景,但日本有啲地方係唔准影相㗎。好似京都有啲寺院咁,即使裡面楓葉幾靚都好,都唔能夠拍照㗎。所以去賞楓前,最好check清楚去嘅地方畀唔畀影相,尊重自己尊重別人。其實,响咁靚嘅楓葉面前,偶爾忘記影相洗版,用眼睛用心去觀賞,都幾好吖!

 

嚐遍日本楓味

楓葉唔只可以用眼賞,仲可以用個口去嚐!好似大阪箕面市有由楓葉製成嘅天婦羅,非常特別。箕面市嘅人仲會將當地山區嘅紅葉攞去醃,之後用油炸成甜品添。講到甜品,十個女人九個半愛甜。日本好多地方都會以楓葉作為甜品嘅主題,好似廣島嘅名產「紅楓饅頭」、將餡料熬成好似秋葉顏色嘅「NERIKIRI」咁,見到一定要試試。另外,仲有好多日本料理係以楓葉做主題,好似以松茸、木耳、粟子、白果、等做成,賣相好似一堆樹葉咁嘅「吹寄」(什錦湯),同埋「吹寄壽司」(什錦壽司),都好適合賞楓時慢慢品嚐。

 

賞完楓影完楓嚐埋好楓味,千祈唔好唔記,返香港前買定啲手信返去畀老闆同事。唔好諗住懶得意執幾塊楓葉曬乾做書籤送畀人就算,幾有心思都好,始終手信最實際。如果唔係,出年想再攞假追楓,都幾難了。

 

#完勝態度  #賞楓