識得 Keep 住濕潤先係完勝 !

之前講過,女人一DRY便輸了,所以保濕好重要。但係,為肌膚保濕只係第一步,要一直贏到尾,保到濕之餘仲要KEEP得到!唔只要外面濕潤,內裡都要滋潤。由外至內全面KEEP,先算完勝:

 

湯水乃滋補之源

好多人天生肌膚屬於乾性,要令肌膚持久濕潤就要由調理入手。廣東人最注重湯水,就係因為湯水有滋補調理嘅功效。例如爵士湯咁,唔只係好好嘅養生湯,仲可以滋陰養顏!爵士湯主要材料有:蜜瓜、螺頭、花膠、瘦肉同雞腳等,上網有好多食譜可以參考。總之,經常飲啖老火湯,皮膚都冇咁快乾!

 

睡個正確美容覺

瞓覺對肌膚修復嘅作用聽得多,美容覺亦都唔少人聽過,但點先算係一個正確嘅美容覺呢?原來,夜晚11點前一定要瞓著嘅覺對肌膚先係最好。因為皮膚新陳代謝最佳時間係夜晚10點至凌晨2點,趁住呢個時間瞓覺的話肌膚修復都好啲,水份都keep得持久啲。另外,瞓時記得唔好開燈,因為燈光照响視網膜上會減少褪黑素,影響肌膚嘅自我修復㗎!

 

給肌膚過冷河

講咗內在點幫手保持濕潤,又講吓外啦,先從洗面入手。洗面嘅水,水溫最好比微暖嘅水熱多少少。因為水溫過高嘅話,好容易帶走肌膚水份,令皮膚更易乾燥。如果係諗住去死皮油脂,可以用熱水洗面,但記得之後即刻用凍水沖幾下,過一過冷河,盡量減少高溫留响面上嘅時間。時不時幫肌膚降降溫,會令鎖水嘅效果更好,自然可以keep住濕潤啦。

 

勤勤力力去角質

每星期為肌膚去角質有助肌膚鎖住水份。去角質時,我哋將肌膚表面層死皮除去,將新嘅、濕潤嘅肌膚細胞帶到表層,咁睇落就更水潤。另外,去除咗角質嘅肌膚更能吸收保濕液,將水份鎖响肌膚入面。所以,好多嘢可以懶,每個星期嘅去角質功課就唔可以懶。

 

吸收天地水份

空氣中嘅水份對肌膚好重要。原來,空氣中嘅濕度至少要有30%,先可以維持我哋皮膚嘅濕潤。香港雖然係亞熱帶地區,但冬天天氣都係好乾燥,邊度有30%濕度? 所以,各位絲打,買部好嘅補濕機啦。尤其係當你瞓緊美容覺時,開住部補濕機,肌膚流失嘅水份都會少啲!

 

記住,肌膚最易出賣女人嘅年齡。Keep得到肌膚嘅濕潤,就等如留住外表嘅青春。希望分享完以上幾點「保持濕潤完勝技」,可以幫到各位keep住水潤keep住靚靚。