完勝日誌
完勝態度

五招開學完勝技 令佢開心Back to school

五招開學完勝技 令佢開心Back to school

每個人身邊總有幾個虎爸爸虎媽媽,想仔女「贏在起跑線」都唔夠,仲想佢哋「贏在射精前」。做盡一切,都只係想仔女有一個完勝人生條路好行啲,真係用心良苦呀!只係,機關算盡,就只算漏一樣嘢…

小朋友係咪鍾意返學先?

唔好誤會,我唔係話小朋友唔鍾意讀書就由得佢,而係想話,點先令到仔女返學返得開心,對學習有興趣肯自覺求學問,先係長遠嘅完勝之道。如果小朋友開學時係開心又興奮,咁已經係贏嘅好開始。所以贏在乜都假,臨近九月,最急切嘅係點樣「贏在開學前」,就等我哋一齊研究吓開學完勝技:

三魂七魄返埋嚟


你過咗個weekend星期一要返工都有Monday Blue啦,更何況小朋友暑假時日日食玩瞓,突然間要佢返返去早睡早起返學放學做功課嘅規律,有Back to School Blue好正常。所以,趁為時未晚,逐步逐步要佢哋回歸規律,今日早一個鐘起身,聽日玩少一個鐘用嚟睇書… 循序漸進,等佢慢慢回到返學時嘅作息,到開學時佢就會易適應好多!

 

爹哋媽咪講舊時


好多小朋友,特別係即將升小一嗰啲,臨近開學都喊晒口,到咗開學嗰日,直情扭晒計唔肯入學校。連學都唔想返,仲講咩贏?想避免咁嘅事情發生,做父母嘅可以同仔女分享吓當年自己返學嘅趣事,自己點準備開學、點樣同同學仔玩咁… 佢哋聽到當年你返學都咁正面,自己對返學嘅感覺都會正面好多,最重要係唔好令佢哋驚咗返學。

 

Good Morning 媽咪


有時小朋友怕開學,好多時都係未適應,又或者對陌生環境感到不安。父母不妨同小朋友玩吓返學role play, 等小朋友喺遊戲中熟習返學流程,同埋令佢哋覺得上堂學習係一件開心好玩嘅事。

 

一家大細傾掂佢


小至返學時午餐食乜,大至返學嘅作息時間表,都可以同埋小朋友一齊計劃。等佢哋覺得唔係爹哋媽咪話晒事,原來自己都有份參與,除咗感覺被尊重之外,亦會對開學更投入。另外,响一齊計劃期間,你仲可以得知更多仔女對返學嘅睇法,對之後點令佢哋鍾意學習好有幫助。

 

齊齊去shopping


大人鍾意shopping,小朋友都係。同仔女一齊去買開學用品,畀佢哋自己揀新書包、新文具。當佢哋好想開始用新嘢時,慢慢就會連帶對開學都有所期待!

 

個個開學唔通個個都想開學咩,所以,令到仔女開開心心期待返學,成為想開學嗰一個,咁你哋响開學方面,經已完勝!

 

#完勝態度  #開學  #Parenting