完勝日誌
完勝態度

教你行山及踩單車完勝技

教你行山及踩單車完勝技

最近開始轉涼,最好就係出去親親大自然,行吓山、踩吓單車,既可以呼吸吓新鮮空氣,個人又精神健康啲,仲分分鐘撞到發哥一齊合照放上面書呃like添!

唔好以為行山踩單車係好簡單嘅事,如果你係呢方面嘅初哥,其實都有好多嘢要注意,先講一講行山:

 

揀條好路嚟行


即使平日喺市區健步如飛身手好,上到山野又會係另一回事。高度、濕氣,都會影響你行山嘅表現,所以新手行山最好揀難度唔好太高嘅路線,好似:龍脊、大潭水塘同萬宜水庫東壩咁,都係香港人行山嘅熱點,風景好之餘難度唔算太高。

 

行山預時睇高度


做人講深度,行山就要計高度。預計行山嘅時間唔可以淨計距離,同樣距離嘅路線,高度、斜度唔同,所需嘅時間都會唔同。要預算行程所需時間,可以參考《尼史密夫定律》:

  • 先計算每小時可走平路距離

  • 上/落一條地圖等高線加3分鐘

  • 背包每3公斤加5分鐘


再加埋預計休息時間,就係你行程大約所需時間嘞。

 

識睇地圖有著數


你以為手機有咕咕map有指南針仲有GPS就唔駛睇地圖?少年你太年輕了!正所謂手機有機會冇電,又或者一個唔好彩行山時跌爛部機點算?而且,網上嘅地圖有好多行山資料唔太詳盡,印定幅地圖點都穩陣好多。
喺香港行山,通常會參考政府出嘅香港郊區地圖(即坊間所講嘅郊遊圖,1:25000)或香港地形圖(即所謂嘅HM20C)。地圖上唔同嘅符號同顏色代表唔同意思,例如:藍色代表水或河流,綠色係山林、草地等,紅色係行山徑,橙色係小徑,黑色係道路、公路,鐵路等,而一層層啡線就係等高線。用地圖按圖例搵實景,就可以確認自己嘅位置。

 

天氣似唔似預期?


行山前另一樣好重要嘅預備工作,就係check天氣。香港天氣常變,即使上山嗰一刻風和日麗,難保上到山時突然傾盤大雨雷電交加。出發前計得上天文台嘅網頁睇定當日嘅天氣預佈。另外,天文台嘅《遠足及攀山天氣資訊》亦係行山人士好好嘅參考。佢可依個別漁農署規劃嘅郊遊徑顯示包括分區氣溫、相對濕度、風向風力同能見度等天氣資訊,非常有用。

 

美人梗要配香車


行山嘅講得差不多,輪到講埋踩單車最緊要嘅,揀車!選購單車登山嘅話,首重舒適、適合爬坡同操控輕鬆嘅。如果車身重嘅話,速度有限,唔適合踩遠路。近幾年流行嘅摺疊單車,尤其係高階嘅,功能越嚟越強大,踩嚟登山都難唔到佢。如果想租唔想買,就記得檢查清楚手柄同座椅有冇鬆、試吓入波嘅效果,最好踩個圈試埋個煞車掣、入波、座椅高度同頭尾燈呀!

 

山野之人帶啲乜?


無論你係去行山,定係踩車登山,都要make sure帶備足夠嘅物品,確保安全。以下係一個小小嘅checklist畀你作參考:

  • 水及食物:如果諗住行足或踩足全日,帶備2升水就差唔多。食物方面最好帶飽肚乾糧,如:麵包、餅、乾果等。

  • 地圖、指南針:迷路時用。

  • 急救包:行山踩車受傷時自行包紥用,必備膠布、消毒藥水等。

  • 後備衣物:最好用防水膠袋包好備用,以防落雨濕身後可替換。

  • 電筒及後備電:照明及求救時用。

  • 萬用刀:唔駛有好多功能,有刀仔同鉸剪已經足夠。

  • 大型垃圾袋:平時可以鋪地休息,落雨可以當雨衣,凍時可以擋風保溫。


 

參考完以上嘅行山踩車入門完勝技,今個weekend就唔好再留响屋企做宅女,辜負秋高氣爽嘅好天氣喇!