完勝日誌
完勝態度

邊個話女人一定輸俾男人 齊齊做個完勝女人

邊個話女人一定輸俾男人             齊齊做個完勝女人

曾幾何時,啲人成日話「女子無才便是德」又或者咩做女人要「三從四德」。當一個女人稍為有少少態度,好聽啲就畀人叫「大女人主義」,難聽啲直接叫佢做BITCH。

其實,呢種心態只不過係父系社會用嚟控制女人,而強加响我哋身上嘅洗腦枷鎖。女人,已經今時唔同往日,唔單只已經撐起半邊天,有啲仲成功過好多男人添。

而一切,都基於「態度改變命運」。

好多成功嘅女性都有自己一套「完勝態度」,即使每個人嘅完勝態度都有啲唔同,但有啲特質係共通嘅:

 

做自己嘅主人


女人,並唔係任何人嘅附屬品。想當年戴妃結婚時,就冇依皇室傳統响誓詞度同查理斯王子講: “I obey”。女人可以去愛,但唔可以盲目服從。我哋固然唔屬於老公,更更更唔屬於老闆。 當你放工後明明好攰,但老闆仲係午夜凶鈴奪命追魂call咁搵你時,試吓唔好再口裡說fxxk,身體卻很誠實咁即刻接call。今日你捍衛唔到你嘅私人時間,他日你點捍衛自己頭家?記住,你唔係任何人嘅奴隸,下下Obey,只會令人生可悲!

 

完勝女人不認命


認命好易,反抗命運爭取成功好難。如果當情J.K. Rowling俾失敗嘅婚姻打沉,認命平凡咁過一生,咁呢個世界上就唔會有陪住你同我成長嘅《哈利波特》喇!無論係愛情、家庭、事業,有時遇到挫折無可避免。但能唔能夠化失敗為完勝,就視乎你有冇一種不甘心嘅傲氣,憑一股唔服輸嘅態度反敗為勝。

 

唔好俾自己消失


有啲女人生咗小朋友之後,就會突然消失… 放心,我唔係講鬼故,我意思係佢會冇咗自己,從此只係「BB阿媽」。但其實,阿媽同自己呢個身份,點解唔可以共存呢?著名影星Angelina Jolie係5個小朋友嘅媽咪,但佢亦同時係國際頂級嘅女星。所以,喺照顧屋企之餘,都唔好冇咗自己。間中同自己約會,享受吓獨處嘅時間,整理吓自己嘅思緒。呢個唔只係生活嘅態度,仲會影響你做人處事嘅態度。

 

年齡並無意義


我諗香港嘅女人除咗對「19+1」嗰一年會有所期待之外,以後無論係29+1到59+1,都只會變成心理關口,覺得到咗某個年紀應該結婚,某個歲數應該退休。不過,响好多成功女性眼中,年齡從來唔係一個局限自己嘅藉口。紅極一時嘅名模Lauren Hutton以61歲高齡拍攝裸照,為嘅就係鼓勵女性唔好以自己身體為恥。堅信自己認為啱嘅事,並努力爭取,將年齡當成純粹嘅數字遊戲… 呢種人生態度,將會令你心境永遠青春。

 

世界上仲有好多好多成功嘅女性,佢哋嘅人生態度都值得我哋參考借鏡,終有一日,我同你都可以創出一套,真正屬於自己嘅「完勝態度」!