完勝日誌
完勝態度

保持完勝態度 做返真.自己

保持完勝態度 做返真.自己

你身邊有冇女性朋友,明明本來好型好有性格,但一結咗婚後,就成個變晒,甘心做老公仔嘅附屬品,做寶貝仔女嘅阿四?

 

其實,香港大部分女性,獨立、堅強、自信,基本上天生已經擁有完勝嘅態度。奈何有好多女人擺脫唔到傳統嘅枷鎖,仍然覺得婚後就要「成熟啲」,要為屋企「犧牲」,唔好介意冇咗自己…

 

前一晚OT到半夜,第二朝想瞓晏少少,叫老公煮一次早餐?Sorry,賢妻良母唔可以咁「自私」,點攰都要起身煎雙蛋!

 

想買著件性感少少嘅靚衫show show quali?唔得喎,响你結婚嗰刻開始,你已被私有化,性感只可以留返畀老公睇!

 

諗住進修吓自己,讀返個 MBA?一樣唔可以囉!你掛住讀書做功課嘅話,仲邊度有時間照顧老公同仔女?冷落老公搞到佢出去搵第二個,就自己攞嚟冇得怪邊個!

 

上面所講嘅例子全屬真人真事。如果你睇到自己嘅影子,咁恭喜晒,即使你塊面仲好白淨,你都已經榮升為一個不折不扣嘅…

 

黃面婆!

 

想擺脫婚後變黃面婆嘅惡夢,女人要時刻保持住完勝,唔會因為身份、環境嘅轉變而冇咗個性同態度。簡單嚟講,三個字:「做自己」!

 

做自己,唔係做人哋心目中嘅自己。社會對女人有太多既有嘅標準,高高瘦瘦係靚,肥肥矮矮係醜… 呢個標準邊個訂?現今女性嘅完勝態度就係要做自己、愛自己、以自己為傲!條腰粗咗啲?Well,幾健碩,幾好吖!五尺爭半吋?夠Cute囉!

 

識得欣賞自己,唔盲目跟從別人嘅標準,係一種態度,一種女性嘅完勝態度。而要維持呢種自信、自我、自在嘅完勝態度,就要唔好因為怕其他人嘅批評,而放棄做自己。你唯一需要介意嘅,可能只有你另一半嘅睇法,但相信佢當初喜歡你都係因為你係你,冇理由唔支持你做返自己㗎。

 

保持完勝態度係冇一條Formula,係冇得教嘅!但只要你夠勇敢,以自信活出真我,就可以婚前婚後都保持住好多女人口裡說不,但心入面其實好羨慕嘅「So What?」完勝態度!