完勝日誌
完勝態度

唔想送錯禮物畀人笑? 教你四大送禮完勝技

唔想送錯禮物畀人笑?  教你四大送禮完勝技

「唔係吓話,送呢啲?」

 

「咦,呢份禮物,咪我上年送畀你嘅?」

 

「… 」(唔知講咩好!)

 

以上嘅說話係咪熟口熟面,你喺收或者送聖誕禮物時,聽過、講過或者諗過?唔好睇少送禮呀,送聖誕禮物其實係一種好高深嘅學問,如果揀咗份唔啱對方心水嘅禮物,輕則對方扮高興氣氛尷尬,重則畀人笑畀人唱足一世。所以,點樣完勝咁送禮,好值得大家研究研究!

 

送禮最緊要一樣,投其所好!想送禮冇得輸,就要摸清送禮目標嘅底,再根據目標性格嗜好嚟揀選禮物:

 

追求健康人士

如果目標係乜都講求健康,成日做運動,食嘢要清淡,早睡早起,仲會冥想添,咁你就要揀返啲同健康有關嘅禮物喇。送運動用品好似有啲expected,與其送物質,不妨考慮吓送佢一個身心嘅體驗?好似一個按摩療程,又或者係一個單車之旅。身同心嘅健康都照顧到佢,如果對方係你嘅情人,仲可以盡顯你細心嘅一面添。

 



 

冇腳嘅雀仔

你同我身邊總有幾個唔知點解咁多假期,又咁多錢錢,可以一日到黑飛咗去玩。對於呢類朋友,送家居用品只係個笑話,因為佢都冇幾可會响屋企。就揀一啲啱佢旅行時用嘅嘢啦。送行李箱?佢多過你啦!其實好多旅行用小物,好似可以一次過插好多gadgets嚟叉電嘅萬用charger、有強勁隔音功能嘅headphone等佢坐長途機時唔會畀隔籬嗰位嘅鼻鼾聲嘈住、又或者一隻設計獨特嘅手錶提醒佢有人响香港掛住佢…  都係一啲啱佢又有心思嘅禮物。

 



朋友中嘅大廚

每次開party,佢都會匿喺廚房為成班friend默默煮出九大簋,聖誔點都要顯示吓對佢嘅謝意啩?可以揀送個港女煲、靚靚圍裙,又或者前排好興嘅慢煮神器?畀佢知你欣賞同珍惜佢為大家嘅付出,咁今年聖誕party又有好嘢食嘞!

 



 

親愛的貓奴狗奴

對於養了小動物的朋友來說,你送嘢畀佢哋嘅「主人」,隨時分分鐘開心過自己收禮物。送一個電子自動餵食器,即使奴才唔响屋企,毛孩都可以定時定候有小食,貓奴狗奴實高興。又或者送特別造型嘅寵物床,好似賽車呀、船仔呀咁,毛孩又覺得新奇、奴才們又覺得得意。再唔係,送啲啱奴才同主人玩嘅小玩具,都好適合㗎!

 



 

以上都其實係一啲例子嚟啫,平時多啲留意身邊人嘅喜好,其實要揀到份啱佢嘅禮物真係唔太難,係視乎你有冇heart嘅啫。希望大家都有一個開心嘅聖誕節,收到同送出嘅每一份禮物都係有心思嘅啦!