完勝日誌
完勝態度

要令目標成真,齊齊踏入完勝2018年!

要令目標成真,齊齊踏入完勝2018年!

距離2018年仲有唔係幾多日,新一年有新計劃是常識吧?

但咪住,响計劃前,不妨回首望返2017年個plan,有幾多實現咗先?

唔好畀我講中,冇幾多個呢?

唔駛心灰,新年計劃實踐唔到係好平常嘅事。縱使計劃時滿懷雄心壯志,但到最後成件事都只會流於儀式 —— 計劃完就當做咗,到年尾又再plan過,無限輪迴,直至永遠…

你想唔想打破呢個無盡輪迴,有一個完勝嘅2018?其實,要令新年計劃成真,係有秘袂嘅:

First of all,訂立嘅目標要實踐-able。太難太高嘅目標,其實同世界和平一樣,只係一個口號,係一個願望,唔係一個計劃 (除非,閣下係侵侵或者肥仔恩)。將目標訂得太高,如果到頭來實踐唔到,反而會消磨自信心。相反,腳踏實地去做新一年嘅計劃,成功率會更加高。

大部份人都希望新一年可以變得更好,但記住:改變,從來都唔係一朝一夕嘅事。將計劃建基於現有嘅基礎上,但係將難度加大。簡單嚟講,如果你平時幾個月先行一次山,就唔好太急進諗住日日去跑步,反而循序漸進,由每星期跑半個鐘步開始,慢慢加上去,會更易實踐。

另外,新一年嘅目標,唔係一定要等到一月一日先開始嘅。唔好睇小人嘅隋性,响等一月一日期間,分分鐘你已經慣咗拖延嘅感覺。 「一年嘅第一日喎,抖一抖玩吓先,聽日先開始啦!」、「唔爭在過埋呢個禮拜,下星期我一定開始!」… 就係咁日復日、月復月,最後拖到原封不動變成2019年嘅新年計劃。

最後最後,响你成功實踐之前,記得唔好將你嘅新年計劃話畀朋友知!有心理學家指出,即使一個人完全未開始為達成目標做任何嘢,只要佢向人講出自己嘅計劃,心理上就已經達到一定嘅成就感。因為當你得到朋友嘅鼓勵時,somehow你已經得到咗獎勵。Again,人係懶嘅,既然已經得到獎勵,到真係行動時,已經失去咗個推動力,好易就會放棄。

來吧,一齊下定決心,實實在在咁計劃新嘅一年,在腳踏實地咁去執行。祝大家新一年做一個更好嘅自己,擁有一個完勝嘅2018年!