Keep 住靚心情 記住5個「不」

“除非你獨居於深山,唔係你身邊總有幾個小人!”今時今日,三人行必有一小人。喺呢個八公八婆當道嘅世代,一個唔覺意,好容易畀啲小人破壞自己努力滋潤好嘅心靈。小人比小強更強,唔駛做啲乜,淨係佢哋嘅存在,已經足以影響心情。之但係,為呢啲咁嘅人影響心情,值得咩?

 

我明,作為一個凡夫俗子,係容易啲受外界影響,但唔好忘記,我哋要做一個完勝嘅女人,滋潤咗嘅心靈就要keep到底!點keep?記住幾個「不」:

 

不暴怒

係係係,有時啲小人、蠢人、無聊人,係會激到人繃繃跳。但當你想拍枱反枱嘅時候,諗吓自己青筋暴現嘅樣,會唔會同街邊啲八婆一樣樣?其實暴跳如雷唔只難睇,仲會傷身又傷心。不如心平氣和講道理,解決件事,唔好影響心情… 真係放唔低,就等件事淡咗之後,先搵機會整返佢,平衡返個心理

 

不自怨自艾

自怨自艾根本係浪費時間,製造負面情緒而對件事一啲幫助都冇。最重要係,成日唉聲嘆氣真係幾好嘅姊妹都會怕咗你。冇咗班好姊妹,邊個同你傾心事(aka八卦)滋潤你嘅心靈?至於點做到唔自怨自艾,試吓focus响正面嘅事,每個人點都有啲好嘢嘅,感激自己所擁有,心情就會好好多。

 

不去討好所有人

父子騎驢嘅故仔,小學生都識,但偏偏好多人大個咗之後嘥晒作者嘅心血,忘記咗呢個寓言故事嘅教訓,成日怕得失身邊任何人 。要知道,你討好到你男友就可能得失好姊妹、討好到上司就可能得失啲下屬(如果你自命好上司)、討好到八公就會得失八婆.. 冇人可以討好全世界,太介意人哋點睇的話,你點滋潤你心靈都冇用,因為一句批評就可以輕易擊毁你脆弱嘅心靈。

 

不放棄自主

有啲女人覺得,下下做小鳥依住個男朋友,乜都聽晒佢話係世上最幸福嘅事。男友話好就係好,話唔好就即刻唔做,世界圍住佢嚟轉,連自己都冇咗,仲講嘅心境心靈?畀條底線自己,唔好乜都say yes。唔好同我講話:「吓,咁即係叫我做港女?」逼男人圍住自己轉就話係港女啫,畀大家有個空間有返自己點叫港女?完勝嘅女人自身價值由自己定義,心境好與壞亦唔要由其他人控制!

 

不鑽牛角尖

有啲嘢唔係自己可以控制,如果將全副心思集中响控制唔到嘅事上,只會帶來壓力同唔開心。縁係天意,份係人為,感情如是,工作亦如是。盡咗力就心安理得,心境就自然可以保持泰然。

 

心靈滋潤咗,努力保持唔好畀外物影響破壞,keep住好心情,先算得上係完勝女人!